Biblioteca Xelmírez I

Recomendacións Lectoras Bacharelato by Biblioteca Xelmírez I on Scribd Recomendacións lectoras ESO by Biblioteca Xelmírez I on Scribd

A ciencia tamén pode ser en galego e no Xelmírez I quixemos visibilizala. O alumnado de 4º ESO e 1º Bacharelato, coordinado polas súas profesoras Rosa Blanco e Isabel Blanco, elaboraron dúas exposicións que puidemos ver estes meses nos corredores do centro e na nosa biblioteca.  O alumnado de 4º ESO destacou cada día do mes de novembro unha efeméride relacionada coa data. Os rapaces e rapazas de 1º Bacharelato foron os responsables de Ciencia que fai historia, unha liña do tempo científica que recolle información das principais científicas e científicos dende a Idade Antiga ata o século XX. Co fin de rendibilizalas e afianzar coñecementos, o profesorado realizou posteriormente un kahoot co que xogaron distintos grupos da ESO e do Bacharelato.  Agardamos que o vindeiro ano nos traia 365 días de Ciencia en Galego!    

A librería dixital da USC vén de poñer en aberto 40 títulos que integran a colección Esenciais USC, un recurso que serve para apoiar o traballo do profesorado e do alumnado, e que resume en moi poucas follas o contido dunha materia.  Consúltaos: Libraría Dixital da USC .

 

O club de lectura de 4º ESO reuniuse para comentar Senlleiras , de Antía Yáñez. Ela quixo estar presente dalgún xeito e tivo a xentileza de enviarnos un saúdo neste vídeo. Grazas, Antía, fíxonos moita ilusión a túa mensaxe e agardamos que, en breve, poidas vir ao noso centro para  intercambiarmos impresións sobre a lectura.  

Literatura da boa, feminista, galega e Premio Nacional de Literatura. Teremos, ademais, a sorte de contar coa súa autora. Á volta do Nadal agardámoste na Biblioteca.

Sen pólvora e cun ramo de magnolias Algúns reclaman a liberdade pro meu pobo. Eu, en troques, esixo tenrura pro meu sexo.                      Carlos Negro Un ano máis o Equipo de Igualdade promoveu a conmemoración dunha data que queremos borrar do calendario. Mentres tanto, cómpre educar para que o feminismo non sexa unha zona de acceso restrinxido.   

Cando se cumpren 120 anos da emisión de Viaje a la luna (Méliès, 1902)- considerada a primeira película de ciencia ficción da historia do cinema- Spencer descubriranos os segredos deste e doutros filmes baseados en obras de Julio Verne.  Non faltes ao club de cine este mércores ás 15:00, unha sesión con Spencer é sempre un luxo que estamos poñendo ao teu alcance!

 

Tecendo Identidade(s) , un dos proxectos desenvolvidos o curso pasado pola nosa biblioteca, foi elixido  como mostra de bo facer pola Consellería de Educación que nos convidou a presentalo este sábado nas Xornadas de Bibliotecas Escolares. Parabéns aos 12 departamentos e 20 docentes que o desenvolveron nos cursos da ESO e en 1º de Bacharelato.  Telexonal TVG.

 

 

Hoxe os 15 Xelmilectorxs de 3º ESO intercambiaron impresións de lectura co autor de O país dos raposos , o noso benquerido Adrián Noia, que visita por segunda vez neste curso a Biblioteca do centro. Algúns dos seus antigos profesores tampouco quixeron perder o encontro. Grazas a Inés Ramil polo precioso debuxo que lle fixo mentres el falaba e que lle regalamos ao final da sesión . Os Xelmilectorxs volverán xuntarse o 10 de xaneiro arredor doutra obra de autoría galega, neste caso O derradeiro libro de Emma Olsen , ogallá nos poida acompañar Berta Dávila .     

      BASES DO CERTAME O  IX Certame Literario de VIAQUA ten como obxectivo contribuír á difusión da cultura da auga, así como fomentar a participación activa da mocidade no uso sostible da auga e o coidado do medio ambiente a través da literatura. Participantes:   Poderán presentarse persoas de calquera nacionalidade, con lugar de residencia en España entre as idades de 12 e 17 anos, que cursen estudos en centros educativos e de Formación Profesional   Categorías : Alumnado de 1º e 2º da ESO; Alumnado de 3º e 4º ESO Alumnado de Bacharelato e FP   Poden presentarse dous tipos de relatos : Relato curto clásico : un relato en formato narrativo non superior a 200 palabras. Relato curto creativo : un relato con formato aberto (poesía, cómic, fotografía e texto...) no que o texto non supere as 200 palabras. Cada autor/a poderá presentar un máximo dun microrrelato inéditoescrito en lingua galega ou castelá. Requisitos que deben reunir os relatos curtos: Deberá e

A Biblioteca convértese por veces nun espazo onde a creatividade e a arte medran ás súas anchas. Así ocorreu onte nunha magnífica sesión impartida por Natalia Val na que o alumnado de 2º de Bacharelato creou á maneira de Hervé Tullet , un artista francés con vocación didáctica.  Os nosos artistas realizaron un ditado no que ían debuxando o que a súa profesora lles indicaba. Deste xeito perdían o medo ao acto creador e entendían a obra de Tullet. O resultado á vista está: esta preciosa obra abstracta de gran formato e creada dun xeito cooperativo e lúdico.     

 

Colle manta, acomódate no sofá e prepárate para gozar con historias de almas en pena porque Fernando Cortizo vén de facernos o mellor agasallo para estes días: subiu á rede a súa película O Apóstolo, a primeira  longametraxe en stop-motion estereoscópico de Europa, que conta no seu haber con 6 Mestre Mateo e no seu día fora nomeada aos Goya.

Infórmate co artigo   “ O mundo das ánimas, os defuntos e a Noite de Defuntos na tradición galega “, do antropólogo Rafael Quintiá Pereira, ou vendo o capítulo 13 de Lendas Vivas, dedicado á Santa Compaña.